الرئيسيةس .و .جبحـثالأعضاءالمجموعاتالتسجيلدخول

شاطر | 
 

 محتاج قربك لا تضيعني ..~

اذهب الى الأسفل 
كاتب الموضوعرسالة
روح الورد ..~
المديرة ..~
avatar

الجنس : انثى
مساهماتي : 738
بلادي : Bahrain..~
عمري : 19
الشكر و التقييم : 38
my sms :
نبي تفااعل في المنتدى .,,~
وعن قرييب في تكرييم للمتميزوون والمتميزات

MY MMS :

مُساهمةموضوع: محتاج قربك لا تضيعني ..~   السبت سبتمبر 03, 2011 12:55 pm


مساأاأاأء \ صباأاأاأح الياسمين والجوري الى احلى قراء واحلى منتدى

...

رواية قرأتها للكاتبة المبدعة ..
بسمة أمل


أعجبتني بشدة .. وحبيت إني أنقلها لكم ..~

و إن شاءالله تعجبكم وتنال على استحسانكم

كل يوم راح أنزل لكم بارت أو بارتين ..~

إنتظروني مع البارت الأول


الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://salma.ba7r.org
روح الورد ..~
المديرة ..~
avatar

الجنس : انثى
مساهماتي : 738
بلادي : Bahrain..~
عمري : 19
الشكر و التقييم : 38
my sms :
نبي تفااعل في المنتدى .,,~
وعن قرييب في تكرييم للمتميزوون والمتميزات

MY MMS :

مُساهمةموضوع: رد: محتاج قربك لا تضيعني ..~   السبت سبتمبر 03, 2011 1:02 pm

محتاج قربكـ لاتضيعني




مآٍزآل بٍدآخليٍ دمعهٍ وصرخٍــهٍ مكٍتومهٍ ,,

مآزآلٍ آلحــزن غآفي وبلحظه يصحى من نومه ..
هدوئيٍ آلظآهٍر ) يخدع هدوءٍ آنسآنهٍ مصدٍومهٍ..




أبسرق وقتي لعينك مدامك ساكن باحشاي ..
وأبرمي كل هالدنيا ورى ظهري وأخليهـا
وأبقبل (حبيبي) عيونك وشوفك غايتي ومناي
لان عيوني العطشا عيونك بس ترويهـا
( تعال ) صافح كفي وحط في يدك يمناي
وهدّيرعشة كفوفي ملامس يدك يدفيهـا




بـ/ آعترف / لك آخر آعترآفـ
آنتـــ / وحدك بس من همني
دآمني مغليــــــ/ك مآعندي خلآفـ
وآن تشتت من غلآك لمني
وآعرف آنك وســـــ/ط قلب مآيخآفـ
سمني مجنونه حبك سمني
لو حبي لك ورى صدري يشآف وآلله آن تقوم ثم /تضمني/….
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://salma.ba7r.org
روح الورد ..~
المديرة ..~
avatar

الجنس : انثى
مساهماتي : 738
بلادي : Bahrain..~
عمري : 19
الشكر و التقييم : 38
my sms :
نبي تفااعل في المنتدى .,,~
وعن قرييب في تكرييم للمتميزوون والمتميزات

MY MMS :

مُساهمةموضوع: رد: محتاج قربك لا تضيعني ..~   السبت سبتمبر 03, 2011 1:10 pm


الجزء الاول



واخيرا
خلصت والله تعبت من الصبح للحين كانت جمله الهنوف وهي تعدل الكتب في
المكتبه , كملت ودخلت حجرتهاا .. حجرتها كانت مشتركه ويه خواتها زهرة و
وفاء .


وفاء: خلصتين؟ .. الهنوف : اي اشوفكم جيتون ساعدتوني


وفاء: نعم تبينا انساعدش , اصلا محد قال ليش روحي نظفي البيت وكسري ظهرش


زهرة : والا يسمع الحين بيتنا فله .. بيت خراب في خراب


الهنوف
: حلفوا ثنتينكم .. اذا احنا ما نظفنا من بنظف وثانيا هااده بيتنا عااد
فله والله خراب اهمشي عدنا بيت غيرنا ما عنده مكان يناام


زهرة : بدت عااد انزين خلاص


هزت الهنوف راسها بمعنى عدم الرضا بكلام اختها واخدت ليها ثياب ودخلت الحمام تتسبح


الهنوف
عمرها 21 سنه الكبيره عند امها وابوهاا جسمها رشيق وطويله شوي سمراويه
((مملوحه)) وعيونهاا عسليه عندها خوات ثنتين الا هم وفاء عمرها 17 توجيهي
بيضه على امها ولون عيونها عسلي مثل اختهاا اما زهرة عمرها 12 سنه صف ثاني
اعدادي مثل الهنوف تشبهااا (كوبي بست) وعندها اخو واحد الا هو محمد عمره 15
سنه في اول ثانوي طويل واسمر على ابوه , ام الهنوف معاقه على ويل جير ما
تقدر تمشي بسبب حادث سياره اما ابو الهنوف متوفي .


الهنوف
هي شايله بيتهم تشتغل وتلبي حاجات بيتهم اطررت تطلع من جامعه بعد ما سووا
امها وابوها الحادث وتوفى ابوهاا, وتشتغل بس حاليا ما تشتغل لان كل الاشغال
تبي شهاده جامعيه وكل يوم تروح ادور بس للاسف ما تحصل, محمد اخوها برغم
صغر سنه بس صار رجال البيت والكل يعتمد عليه



..............................



بيت ابو رائد


ام رائد وهي عند الدرج: العنود بسرعه لا نتأخر يمه


العنود : انزين امااه بس بلبس دفتي


ام رائد وهي معصبه: هالبنيه بتدبحني بسرعه اتأخرنا خالتش وبناتها يحارسونهااا ,, اني من متى قايله ليش روحي برزي


العنود وهي على الدرج : انزين عااد وااجد تتحلطمين عليي هااكو نزلت


ام رائد: غلطاانه وترد يلا اخوش من متى برى ينطرناا


طلعت العنود وهي تتحلطم على امهااا


رائد يفتح باب السياره الى امه من دااخل : حيااش يمه اتفضلي


العنود : الى امي تفتح الباب اني لا .. جي اني بت الغساله


رائد: انتين لو لسانش يقصونه جان زين


ام رائد: عنودددده سكتي عن اخوش


العنود: انزين كل ايزفووون وبس بسكت خلاص


رائد ابتسم على اخته الا متعودين على ازعاجهاا وحشرتها


ام
رائد مديره في مدرسه ابتداائي كلها جم سنه تتقاعد عندها بنات ثنتين وصبيان
انثنين اكبرهم رائد عمره 26 سنه يشتغل في شركه ويه ابوه رائد وسيم الى
اقصى حد مو ابيض ولا سمر نقدر انقول حنطاوي وجسمه رياضي وشخصيته قويه
وبعدين فاطمه عمرها 25 سنه متزوجه ماخده ولد عمها احمد وحاليا حامل في
الشهر الثامن ((يعني قربت الولاده)) وبعدين علي عمره 22 سنه اخر سنه جامعه
يدرس بزنز واخيرا العنود عمرها 17 سنه توجيهي .


وصلت الهمر عند بيت ام فيصل


ام رائد : يمه ما بتنزل تسلم على خالتك وعيالهاا


رائد: امبلى يمه بس بعدل السياره وبلحقكم


العنود: اني بنطرك بدخل ويااك اووكي .. رائد ابتسم ليها بمعنى الموافقة


في
هالاثناء كانت ليلى تطل من دريشه حجرتها على رائد وتبتسم واجيها اختها
وتعطيها ضربه على ظهرها وتصرخ ليلى : اي عورتنيي لويه تضربيني


مشاعل : عبالش ما شفتش ... ليلى: جي ويش سويت علشان شفتيني


مشاعل : اني الا اعرفش كنتتين اطلين على رائد ولد خالتي .


ليلى: عادي ولد خالتي .. مشاعل : لا والله ولو شافش ويش بقول


ليلى : امممم بقول هاادي ليلى بنت خالتي الا تموت عليي


مشاعل : ههههههههههههههه حلوه دي انتين مجنونه لو عاقله


ليلى: مجنونه بحبي الى رائد


مشاعل : لا اختي خرفت وقعدت مااقدر اقول الا الله يهديش


ليلى: شايفتني مجنونه


مشاعل : الهدايه على المجنون والعاقل .. الله يهديني ان شالله


ليلى
ومشاعل بنات خاله رائد والعنود ليلى البنت الكبيره عند ام فيصل عمرها 23
سنه اخر كورس في جامعه وتموت على رائد بس رائد ما يدري عنهاا يعني عايشه
احلامها بروحهاا برغم يتقدمون ليها وواجد بس هي ترفض علشان رائد


مشاعل : 21 سنه في جامعه تدرس بزنز في نفس جامعه الا فيها علي


ام
فيصل: حياك يا رائد ما في احد غريب ... رائد: ما الغريب الا الشيطان خاله ,
وهو يتقدم ليها ويحبها على راسها , شخبارش ويش امسويه .. ام فيصل: بخير
يمه عسااك بخير انت شخبااارك


رائد: الحمدلله .. عجل وين فيصل


العنود : اني بركب فوق الى بنااات وبننزل


ام فيصل: مطرشتنه الجمعيه اجيب جم غرض وبجي على وصول الحين


ام رائد: شخبار ابو فيصل والبنات


ام فيصل: كلهم بخير .. وين فطوم عجل ما اشوفها ويااكم


ام رائد: تعرفين الحمااال متعبنهااا هالاسبوع ما جت الا مرتين البيت


ام فيصل: الله يسهل عليها ان شالله


يدخل فيصل وهو حامل الاجياس : انا اقول البيت منور طلعت الخاله وعيالها اهني شلونكم شخباااركم , نسال عنكم وينكم من زماان ما اجون


رائد: ههههههههههههه خلاص عااد انت للحين على هالمواال بس ما نبغي سلامك خلاص


فيصل: افا ولد الخال ليش عاااد


رائد: وويش درااني عنك


يتقدم فيصل ويوااجهه رائد ويسلم عليه ويحب راس خالته ويسلم عليها


رائد: فصول انا بروح القهوى بجي


فيصل: اكيد ومن غير شك من زماان ما اسهر والشباب بعد من زمان ما اشوفهم


رائد : يلا عجل قمنا انشوفش على خير خاله وسلمي على ابو فيصل


ام فيصل : يو صل ان شالله


فيصل الولد الوحيد عند ام فيصل وابو فيصل عمره 25 سنه يشتغل في الشركه ويه رائد وعلى طول ويه بعض يعني مو بس اولاد خاله , اصدقاء


تنزل ليلى ومشاعل والعنود وهم على الدرج ليلى كانت تدور الا في بالها بس ما ليه اثر


مشاعل فهمت على اختهاا : عنوده من جايبنكم ؟


العنود: رائد


مشاعل : يعني هو اهني ؟


العنود: اي ويش فيكم .. يوم ركبت ليكم كان ويه خالتي يسلم عليها يمكن الحين طلع


نزلوا البنات وسلموا على خالتهم وقعدوا سوالف وضحك



.......................



زهرة : هنووووفه ملل خلنا نطلع


الهنوف : وين نروح يعني لا عدنا لا اهل ولا شي جان زرناهم ماعدنا الا خاله وحده لاتدري عنا ولاندري عنها


وفاء: راحت قطر ونستنا ....المهم والله خاطري من زماان ما نطلع


الهنوف : انزين وين نروح عااد


زهرة : ماادري اني ابغي اطلع .. كل الاوادم تطلع الا احنا ليش يعني ويش ناقصناا


الهنوف دمعت عينهاا على حال خواتها ماتدري ويش اتسوي


وفاء : زهرة خلاص بصيح ترى اني


الهنوف : انزين امشوا بنروح الحديقه الا في نهايه الشارع بنقعد


زهرة : ههههههه اقول ليش ابغي اطلع اتقولين الحديقه الا مافيها لعبه صاحيه كلها مكسره


الهنوف: يعني وين انروح سياره وما عدنا وفلوس ما فيه


وفاء: عجل قومي نطلع نتمشى ونشتري ايسكريم لبن ونرجع


الهنوف ابتسمت على خواتها الا بسرعه يرضون : انزين قوموا نروح نستأذن من امي وبعدين نطلع ونشوف محمد اذا بجي وياانا


زهره: الا يسمع بنروح مجمع لو سينما علشان تعزمين الاواادم


وفاء: يعني ما بتسكتين حشرتينا من جيتين من المدرسه للحين


الهنوف : وفوووي خلاص خليها تعبر عن مشاعرهاا


طلعوا من الحجره واتوجهوا الى حجره امهم طقوا الباب ودخلوا


ام الهنوف وهي تسكر القران : صدق الله العلي العظيم ,, ها يمه ويش عندكم


زهرة : يمه عطينا فلوس بنروح نشتري ايسكريم


الهنوف ايتسمت على اختها الا بسرعه راح زعلهاا وعجبتها فكره الايسكريم


ام الهنوف : من بروح ويااكم


الهنوف : يمه البنات متمللين من زمان ما طلعوا قلنا بنطلع نتمشى شوي وبنشتري ايسكريم وبنرجع ما بنتأخر لا تحاااتين


ام الهنوف وهي تعطي الهنوف لفلوس : اتحملوا بروحكم هالزمن ماليه امان


وفاء: لا تحاتين يمه ويانا الهنوف عن سبعين رجال


الكل ضحك على وفااء


مروا على محمد الا كان قاعد في الصاله يطالع تلفزيون برغم ما في رسيفر والقنوات مو واضحه بس يسلي روحه


الهنوف : حموووود بجي ويااناا


محمد : لا ماليي مزاج اطلع بس اتحملوا ترى الشارع ظلام الى ورى البيت .. الحين احترق ما بحطون غيره الا بعد سنه


طلعت الهنوف خواتها وهم حدهم مستانسين


الهنوف زهرة جودي ايدي اليمين وفوي جودي اليسار لان ظلام


زهرة : اني خاايفه ما اشوف


الهنوف : اتحملي شوي وبنطلع من هالشارع


وفاء : اصلا ضوء القمر منور المكاان


زهرة :اقول اتحجت الرومنسيه


ظلوا يتمشون في الشواارع الا بين عليها الفقر وناس على قد حالهم


زهرة : امشوا بقعد على المرجحانه من زماان ما لعبت


وفاء: بسرعه عاد ابغي ايسكريم


الهنوف : خليها تلعب ما عليش منها


وفاء: انزين اني بروح بشتري وبجي


الهنوف : لا نروح ثلاثنا جميع .. انت شوفي اشكثر صبيان عند البرااده ما يسوى تروحين بروحش


زهرة : هنوفه بقول ليش شي بس لا تعصبين


الهنوف : ويش ؟ ... زهرة: امم عطونا اوراق الانجليزي ودرجتي مو زينه


الهنوف : انزين جم اخدتين ؟؟


زهره : 15 من 20


وفاء: ههههههههههههههه الحين اني قلت انش راسبه صدق ما عنددش سالفه


زهره: هي لا تضحكين بس هنوفه تعبت ويااي وهي ترااجع ويااي


الهنوف : ما عليه زهووور ان شالله الاختبار الثاني تعوضين


وبعدها راحوا البرااده وهم داخلين


: اقول ياحلوين شنو تبيون


البنات عرفوا ان يقصدهم بس ما ردواا عليه دخلوا وهم ساكتين


الولد: وهو يتقدم .. عطونا وج عااد


الهنوف اخدت ثلاثه ايسكريم وزهرة كانت مجوده دفتها حدها خايفه


دفعت الفلوس وطلعت


الولد:
اقول صدق بنات فقارة احط يشتري ايسكريم لبن هههههههه وضحكوا كل الا ويااه
(( صادني موقف من قبل وحده شافت عند صديقتي كاكو الا اتسوي ليها صدق كاكو
فقارة .. حتى الاكل الى فقارة واغنياء .. صدق زمن ... سوري طلعت عن القصه
شوي ))


وفاء: صدق قليل ادب


الهنوف : حقريهم وفاء خلهم يولون


وفاء: قهرني قليل الادب .. عجل حتى الايسكريم صار مال فقارة واغنياء


زهرة : اقول عطوني ايسكريمي لا يذوب


الهنوف ضحكت على اختها : تفضلي يا زهرة بيتنا ,, انزين الا صار ما ابغي امي تدري عنه


وفاء: ما يحتاج اتوصين اصلا



................................



صباح الجمعه


العنود: صبااحو يا احلى ام في الوجود


ام رائد: صباح النور ويش مقعدنش من الصبح


العنود : ما ادري قعدت وخلاص


ابو رائد: السلام عليكم ... اوه العنوده قاعده من الصبح


ابتسمت العنود الى ابوها : هلا ابويي ,, اي قلت ابغي اتريق ويه احلى اثنين اليوم


ام رائد : عجل روحي قعدي اخوانش خلنا كلنا نتريق جميع


العنود
وهي تركب الدرج تنادي علي ,, رائد , علي ,, رائد(( هذا انواع الازعاع ))
وصلت حجره علي طقت الباب ودخلت الحجره كانت بارده وظلام وعلي ما ابين منه
ولا شي ونايم بسلام بس العنود ما تخلي الواحد في حاله فتحت الثلاجه واخدن
غرشه ماي وفتحتهاا شالت البرده ((للحاف)) عن اخوها وكتت الماي على وجهه


علي قعد وهو يصرخ اي اي ويش سويتين


العنود : هههههههههههه لا بس كنت اقعدك من النوم


علي وهو معصب : واحد يقعد جدي طلعي برى بسرعه لا تشوفين شي ما شفتينه


طلعت العنود وهي تضحك وسيده دخلت حجرة رائد من غير ما طق الباب


رائد: يا لله صباح خير... ويش تبين


العنود وهي للحين تضحك


رائد: ويش فيش اكيد مسويه شي .. اتحجي واذا ما بتتحجين طلعي برى


العنود : ويش صاير اليوم كل من يطردني .. قوم اتريق بسرعه لا يكمل .. وطلعت


رائد ابتسم على تصرفات اخته بس تذكر شي اخفى هالابتسامه .. ذكر ربه وقام ما يبغي يعكر مزاجه من الصبح


نزل كل من علي ومحمد وصبحوا على امهم وابوهم والعنود كانت منخشه صوب امهاا


علي: لا تنخشين بتحصلين ضرب اليوم ما بهدش


رائد: ههههههه اني قلت ضحكها يعني مسويه شي


ام رائد: ويش مسويه الى اخوش


العنود وهي تلصق في امها: ما سويت شي بس كتيت عليه ماي علشان يقعد


علي ومسوي روحه معصب: تقهرني اتقول بس كتيت ماي ويش تبين اتسوين ازيد بعد


الكل ضحك على شطانه العنود


ابو رائد : ما عليه علي اتحملها هاادي اختك كلهاا..... وسكت


محد انتبه الى كلامه غير رائد وام رائد


ام رائد حست بغبنه وسيده قامت


العنود : اماه وين بتروحين


ام رائد: بروح اجيب ماي وبجي


.....................................



محمد: بسرعه الا في حمام يطلع بروح بشتري خبز


وفاء: حمام واحد في هالبيت انزين لا تصرخ


شوي وجي زهرة حامله المعجنون والفرشااه .. اوف هاادي للحين في حمام ويش اتسوي


محمد: علمي علمش صار لييي ساعه واقف احارسها تطلع


طلعت وفاء .. نعم ويش تبوون حتى ما تخلون الواحد يتسبح على راحته


زهره : اقول روحي سووي الريوق ويه هنوفه وبلا هدرة وااجد


وفاء انقهرت ولا ردت عليهاا


اما محمد دخل بعد وفاء قبل ما تنتبه ليه زهره وتدخل قبله


بعد 10 دقايق


الكل مجتمع على السفرة البسيطه المكونه من جبن مثلثات وعسل وبيض مفيوح وحليب وينطرون محمد يجيب الخبز


زهرة : اني اتمللت واني انطر جوعانه


الهنوف: الحين بجي ... هاكو صوت الباب يعني جاء


جاء محمد واتريقوا بكل هدوء


الهنوف: يمه باجر بروح الشركه الا شفت عنها الاعلان يمكن احصل يشغل


ام الهنوف: ان شالله يمه الله يوفقش ياربي ويسر امورش


ابتسمت الهنوف على دعوه امها الا طالعه من قلب ام حنون على بنتها



..............................



فاطمه: بخير يمه اسأل عنكم


ام رائد: ليش ما جيتين يمه على الغدى اليوم


فاطمه: تعبت شوي ما قدرت اجي


ام رائد: الله يسهل عليش ان شالله ... المغرب تعالي لان بيت عمش بجون على العشى


فاطمه: لا ان شالله بخلي احمد اجيبني


ام رائد: عاد خلي احمد ينزل


فاطمه: اوكي يمه ... يلا مع السلامه


سكرت ام رائد التلفون من عند بنتها وراحت المطبخ اجيك على الخدم وتساعدهم


في التجهيز الى العشى



..........................................

إنتهى البارت الأول ..~

إنتظروووني مع الجزء الثاني ..

آآرائكم و توقعاتكم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://salma.ba7r.org
 
محتاج قربك لا تضيعني ..~
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مُنتَدى سَلمَى ..~ :: الــقِــسم الأَدَبي :: القصص و الروايات-
انتقل الى: